CABATUAN, ILOILO – Nagsaka sa 125 ka bibe ang patay matapos ang ginapahayag pag-atake sang ‘chupacabra’ sa Brgy. Gaub, Cabatuan, Iloilo.
Sa interview sang Bombo Radyo kay Jenil, 29 anyos kag isa sa mga nagabantay sa farm, iya ginpahayag nga mismo ang iya tiyo ang nakakita sa duha ka tinuga nga amo ang nagapamatay sa mga sapat.
Ginpahayag ni Jenil nga bangud sa kakulba, nagkuha sang kutsilyo ang iya tiyo kag sa iya nga pagbalik, naglukso na sa masobra sa apat ka tapak nga kudal ang duha ka indi mapaathag nga tinuga.
Santo sa paglaragway sang tiyo ni Jenil, ang duha ka maitom nga tinuga nga una na nga ginpahayag nga chupacabra ang kasubong sang daku nga ido kag may taliwis nga dulunggan.
Bisan ang ila mga ido suno kay Jenil ang naga-atras kag kasubong nga nahadlok sa duha ka tinuga nga suno sa iya kasubong sang sigbin.
Samtang, suno naman sa tag-iya nga si Vicky Soldevilla, ini ang labing una nga kahigayunan nga may yara sang indi mapaathag nga tinuga nga nagpamatay sang ila hinuptanan nga bibe.
Makatilingalahan suno kay Soldevilla nga nasarangan sang duha ka tinuga nga maguba ang mapag-on nga kurong kag kudal.
Ang mga nagkalamatay nga bibe ang may pilas sa liog, wawa ang dughan kag kasubong nga ginsuyupan sang dugo.
Bangud sini, ginpa-blotter na lang sang natungdan ang natabo.
