Opisyal na nga gin-withdraw sang GT Poultry Farm ang civil case nga ginpasaka batok sa opisyal sang barangay kag 18 ka residente sang Barangay Linobayan, Tigbauan, Iloilo.
Sa interview sang Bombo Radyo kay Punong Barangay Rene Taño, iya ginpahayag nga nakasugilanon sila sa tag-iya sang poultry farm kag gin-withdraw ang kaso nga may kaangtanan sa writ of prohibitory injunction with damages sang Oktubre 9.
Suno kay Taño, ila gid ginakalipay ang pag-withdraw sang kaso bangud makapadayon sila nga mga opisyal sang barangay sa pagserbisyo sa mga pumuluyo nga wala na sang problema nga ginadala bangud sang kaso.
Matandaan nga nag-ugat ang problema sang 2025 bangud sa baho kag mga langaw halin sa poultry farm nga nahamtang sa kaiping nga barangay nga ginareklamo sang mga residente sang Brgy. Linobayan.
Sang Agosto 2025, ginpasakaan sang kaso ang mga barangay official kag mga residente matapos ang ila pag-reklamo.
Bangud sini, nagpasa sang mass resignation ang mga opisyal sang barangay, lakip ang kapitan, pito ka kagawad kag ang Sangguniang Kabataan chairman, sang Agosto 26, 2026.
Pahayag ni PB Taño, wala nadayon ang ila pagbuya sa puwesto matapos wala gin-approve ni Tigbauan Mayor Virgilio Teruel ang ila resignation kag amo man ang paghingyo sa sila ni First District Representative Janette Garin nga magpadayon sa pagserbisyo.
Dugang pa niya, may mga kondisyon nga dapat tumanon ang magtimbang nga partido sandig sa joint motion nga ginpasaka sa korte, agud malikawan nga masulit pa ang pareho nga problema.
Sa subong, nagapabilin nga temporaryo nga wala naga-operate ang poultry farm bangud may kinahanglan pa nga i-comply ang tag-iya.
