Ginplastar sang isa ka Bombo Abogado nga dako ang salabton sa layi sang mga indibidwal nga nagapanag-iya sang pusil nga gin-gamit sang duwa ka menor de edad nga suspek sa pagpangluthang sa eskwelahan sa Tacloban City.
Natabo ang krimen sa sulod mismo sang San Jose National High School kun sa diin tatlo ang patay kag 20 ang pilason.
Ang mga suspek amo ang 15-anyos nga si alyas “Rod” kag ang 14-anyos nga si alyas “Nash” nga lunsay learners man sa nasambit nga eskwelahan.
Sa interview sang Bombo Radyo kay Atty. Noel Palomado, iya ginpahayag nga indi lang civil cases kundi criminal cases pa ang pwede mapasaka batok sa matuod nga tag-iya sang mga pusil nga gin-gamit sa pagpangluthang.
Una na naggwa sa imbestigasyon nga ang Glock 17 pistol nga gin-gamit ni alyas Nash ang ginapanag-iyahan sang iya tiya nga police officer nga assigned sa Police Regional Office-8 (PRO-8).
Ang .38 caliber revolver naman nga gin-gamit ni alyas “Rod” ang na-trace nga halin sa isa ka security agency nga na-base sa Cebu.
Ang amo nga police officer ang napaidalom na sa restrictive custody kag mahimo mangatubang sang criminal case para sa malversation sa idalom sang Article 217 sang Revised Penal Code.
Posible man ini nga mangatubang sang administrative sanctions pareho sang P10,000 nga multa bangud sa kapaslawan nga mag-report sang lost firearm, revocation sang iya firearms license sa idalom sang Republic Act No. 10591 ukon ang Firearms and Ammunition Regulation Act, kag ang administrative case para sa grave misconduct sa idalom sang National Police Commission (Napolcom) Memorandum Circular No. 2016-002.
Samtang, ang security agency naman ang mahimo mangatubang sang revocation sang license to operate bangud sa kapaslawan sa pag-report sang lost firearm sa idalom sang Section 198 sang implementing rules and regulations sang RA 11917 ukon ang Private Security Services Industry Act.
Nahibaluan nga naggwa sa imbestigasyon nga nagatrabaho sadto sa nasambit nga agency bilang security guard ang lolo ni alyas Rod.
