Ginaplano sang tag-iya sang salakyan kon sa diin nakit-an ang duha ka mga bata nga nadula sa Baldoza, La Paz, Iloilo City nga i-dispose ang iya salakyan.
Sa interview sang Bombo Radyo kay Roy Dela Cruz, tag-iya sang abandonado nga salakyan, iya ginpahayag nga sa ila pag-istoryahanay kaupod ang iya nga pamilya nga luyag man nila ukon indi, ipa-kilo na lang ang salakyan.
Suno kay Dela Cruz, kon yara siya sa ila puluy-an, tahap ang mga kabataan nga magsulod sa ila nga sonar bangud man masami sini nga ginasaway.
Apang, natabo-an lang sang nagligad nga adlaw nga wala siya, rason nga ang kabataan ang nakasulod sa salakyan.
Ginpahayag man sang natungdan nga ang driver’s side lang nga pwerta sang salakyan ang indi mabuksan, samtang ang tatlo ang mahimo mabukas.
Wala naman nadula sa panghuna-huna ni Dela Cruz nga na-lock sa sulod ang mga pwertahan rason nga wala ini gilayon nabuksan sang i-rescue na ang kabataan.
Una na nga nagpahayag ang Iloilo City Police Office nga wala na sila sang awtoridad sa salakyan bangud man nga yara ini sa sulod sang sonar sang tag-iya antes natabo ang pagkadula sang mga bata.
