ILOILO – Gin-athag sang Iloilo Provincial Government nga wala pa nakapauli sa probinsya sang Iloilo ang seaman nga taga-Barotac Nuevo, Iloilo nga positibo sa Delta variant sang COVID-19.
46 anyos ang pasyente, lalaki, isa ka returning overseas Filipino, kag yara pa subong sa isa ka hotel sa Sta. Rosa , Laguna.
Sa interview sang Bombo Radyo kay Iloilo Provincial Health Officer Dr. Ma. Socorro Quiñon, iya ginpahayag nga positibo na nga daan sa COVID-19 ang amo nga seaman sang nagbyahe ini halin sa Spain.
Nagquarantine ini sa hotel sa Laguna halin sang Hulyo 10 kag positibo man gihapon sa repeat testing sang Hulyo 27.
Nadulaan ini sang panamil apang wala naman sang iban pa nga malala nga ginabatyag sa lawas.
Ipatigayon liwat ang repeat testing subong, Hulyo 30, kag kun negatibo na ang resulta sang test, pwede na ini nga makapuli sa Iloilo.
Nagapakig-angot man ang Iloilo provincial Government sa pasyente.
Apang suno kay Quiñon, santo sa ila naistoryahan sang lalaki, bangud kinahanglan man gihapon ini mag-quarantine kun magpauli ini sa probinsya sang Iloilo, mas pakamaayuhon sini nga indi na lang magpauli kag magbalik na lang liwat sa trabaho.
