ILOILO – Wala sang dapat kahangaw-an ang mga pumuluyo sa Concepcion, Iloilo apisar may na-rekord na nga Delta variant sang COVID-19 sa amo nga banwa.
Sa interview sang Bombo Radyo kay Concepcion Mayor Dr. Raul Banias, iya ginpahayag nga ang delta variant case amo ang Overseas Filipino Worker (OFW) nga naka-recover na nga daan antes ini nagpauli sa Concepcion.
Halin sa South Africa ang amo nga seafarer kag Hulyo 12 nag-abot sa Pilipinas.
Nagpositibo ini sa swab test, gin-quarantine, kag pagkatapo sang quarantine period, gindeklarar sang Department of Health (DOH) nga clinically recovered na ini sa virus.
Ginpasugtan ini sang Bureau of Quarantine nga magpauli sang Hulyo 29. Pag-abot sa Iloilo, gin-quarantine pa ini sa Iloilo Sports Complex kag ginsugat sang ambulansya sang Concepcion.
Ginpasugtan ini nga mag-home quarantine.
Ulihi na nag-abot ang resulta sang genome sequencing nga positibo ini sa Delta variant.
Sa subong, apisar negative na sa COVID-19 ang pasyente, gin-isolate ang pamilya, gina-check kun may yara sang sintomas sang balatian, kag ipatigayon ang swab test kun kinahanglan.
