ILOILO CITY– Nakibot ang pila ka eskwelahan nga nagpasakop sa Dinagyang Ati Tribes Contest nga may yara sang buhin nga 20% tax sa ila premyo.
Sa interview sang Bombo Radyo kay Teresita Militar Principal III sag La Paz National High School, iya ginpahayag nga 20% ang nabuhin sa ila 1 million pesos cash nga premyo sa diin 800,000 nalang ang ila nabatun.
Suno kay Militar, nakibot lang sila bangud sang nakaligad nga tinuig, halos wala man sang ginbuhin ang Bureau of Internal Revenue sa ila premyo.
Pahayag pa niya, posible nabuhinan ang ila premyo bangud may yara sang mandate nagikan sa nasambit nga ahensya sang gobyerno.
Dugang pa sang natungdan, ini ang labing una nga beses nga na-eksperyensyahan nila nga may yara sang ginbuhin para sa tax
Nahibaluan nga ang Tribu Paghidaet ang ginkilala nga Kampeon sa Dinagyang 2020 Ati Tribes Contest sa diin nakabatun sila sang 5 million nga premyo nga ginalakipan sang cash kag 4 million nga balor sang school project.
