ILOILO CITY – Ginakasubo sang tagdumalahan sang Iloilo Central Elementary School ang pagkamatay sang Grade 1 pupil bangud sa Dengue Hemmorhagic Fever.
Sa interview sang Bombo Radyo kay Judy Fabular, School Clinic Teacher sang nasambit nga eskwelahan, iya ginpahayag nga ang kamatayon sang anum ka tuig nga anak sang mag-asawa nga Hortilla sang Zone 2, Brgy. Tacas, Jaro, Iloilo City ang ikaduha na nga estudyante sang Iloilo Central Elementary School nga napatay bangud sa Dengue.
Suno kay Fabular, bag-o pa man nagduging ang Dengue sa syudad sang Iloilo, may yara na sang orientation sa mga estudyante kag ginikanan tuhoy sa kun paano malikawan ang pag-angkon sang nasambit nga balati-an.
Sa pagkamatuod suno kay Fabular, ang bintana kag pwertahan sang classroom sang napatay nga estudyante ang may yara sang screen agud nga indi makasulod ang lamok.
Magluwas sa pagpaninlo suno sa natungdan, ginapanugyan sa mga estudyante nga magsuksuk sang pantalon kag long sleeves sa tion nga mag-eskwela agud nga indi makagat sang lamok.
