TUBUNGAN, ILOILO – Nagalibog ang ulo sang isa ka tagreklamo sang malutak nga dalan sa Brgy. Sibucauan, Tubungan, Iloilo, matapos nga siya ang ginpa-summon sang project engineer sang amo nga proyekto.
Sa interview sang Bombo Radyo kay Ernesto Talidano, tagreklamo, iya ginkwestyon ang engineer kon ngaa siya pa ang may kaisog nga magpa-summon apisar nga ang proyekto nga dalan ang nagtuga sang huol sa ila nga mga motorista kag residente.
Suno kay Talidano, madugay na nga ginareklamo ang malutak kag daw gin-arado nga dalan bangud sa natuga sini nga halit sa ila.
Ginlaragway man sini nga bilang nagalabay sa amo nga dalan, may bes nga nakakas ang bumper sang iya awto kag van nga salakyan bangud sa mabudlay kag madanlog ini nga agyan.
Ini ang nagtulod man sa natungdan agud nga mag-request sa mga trabahador sang proyekto nga temporaryo nga butangan lang anay sang balas ang alagyan agud nga indi ini mangin madanlog.
Nagpamalibad naman ang mga trabahador nga wala ang ila engineer bangud nga may ginkadtuan.
Nagpanugyan naman ini sa engineer nga nagpa-summon sa iya nga kon mahimo, butangan lang anay sang balas agud nga wala na sang may madanlog ukon maguba nga salakyan.
