ILOILO CITY – Nagakadapat nga tungdan sang maayo sang tagsa ka ahensya sang gobyerno ang ila katungdanan may kaangtanan sa repatriation sang mga na stranded nga Overseas Filipino Workers.
Ini ang kasunod sang pagpahayag ni Iloilo City Mayor Jerry Treñas sang pagkadismaya bangud nga kasubong nga ginpabay-an sang concerned agencies ang Ilonggo OFW nga temporaryo nga nagatinir sa isa ka hotel sa syudad sang Iloilo.
Sa interview sang Bombo Radyo kay Treñas, iya ginpahayag nga ang Inter-Agency Task Force ang ginalakipan sang nanari-sari nga ahensya sang gobyerno kun sa diin ang kada isa ang may yara sang trabaho.
Suno kay Treñas, kinahanglan nga magbuligay ang tagsa ka ahensya sang gobyerno agud nga wala sang may matabo nga problema indi kasubong sa pagpauli sang kapin sa 200 ka OFW halin sa Metro Manila.
Ginpahayag ni Treñas nga sa iya pagkahibalo, may yara sang P10,000 nga budget ang Overseas Workers Welfare Administration para sa kada OFW gani, wala sang rason nga indi mahatagan sang nagakaigo nga bulig ang mga balikbayan.
Kun wala lang kun tani nagapabaya ang concerned agencies, indi na kinahanglan suno sa alkalde nga magpahilabot pa ang Local Goverment Unit sa trabaho nga indi man ila.
Lakip sa mga nahingadlan nagpatigayon sang repatriation amo sanday Iloilo City Lone District Congresswoman Jam Jam Baronda kag Iloilo 1st District Rep. Janette Garin apang wala man direkta nga gin-angot ni Treñas ang duha ka mga opisyal may kaangtanan kapaltahan nga nagakatabo subong.
Kadungan sini, gin-anunsyo sang alkalde nga may lima ka OFWs nga nagpositibo sa Polymerase Chain Reaction test kun sa diin 4 ang taga syudad sang Iloilo kag 1 ang taga probinsya sang Guimaras.
