ILOILO CITY – May gintukod nga quick response team ang tagsa ka opisina sa Iloilo City Hall agud nga magresponde pananglitan nga may insidente nga matabo.
Sa interview sang Bombo Radyo kay Ms. Donna Magno, pinuno sang Iloilo City Disaster Risk Reduction Management Office, iya ginpahayag nga ang ini nga mga teams ang ginpaidalom sa training sang nagligad nga tatlo ka semana.
Suno kay Magno, katuyu-an sini nga mahanda ang mga opisina sa anuman nga emerhensya.
Sa katapusan nga quarter sang tuig, magapatigayon sang earthquake ukon fire drill ang syudad sa Iloilo City Hall.
Nag-apelar naman si Magno sa mga empleyado nga maghatag gid sang tion kun may yara sang orientation sa disaster preparedness kag sa risk reduction and prevention.
Kahapon, nagkinaran-karan ang mga empleyado sang Iloilo City Hall matapos nga nag-aso ang trapal nga nahulugan sang kalayo nagikan sa grinder sa hagdan padulong sa ikawalo nga panalgan sang building.
