Nagpaathag ang Department of Social Welfare and Development (DSWD) nga dapat wala sang lamod-pamulitika sa anuman nga mass payout sang ahensya pati na sa tagtaganay sang Assistance to Individuals in Crisis Situation (AICS).
Ini isa sa mga programa sang gobyerno nga exempted sa spending ban sandig sa nakabutang sa probisyon sang Section 261 sang Omnibus Election Code.
Sa interview sang Bombo Radyo kay Atty. May Castillo, spokesperson sang DSWD Region 6, iya ginpahayag kun may payout, may mga personnel man ang opisina nga ginapadala nga amo ang in-charge.
Kun may mabulig man ang mga opisyal sang barangay suno sa natungdan, posible nga ini amo ang pagpasigurado lang sang seguridad sang mga tawo sa area.
Bangud non-partisan kag non-political ang ahensya suno kay Castillo, ginapahanumdom sa mga kandidato sa Oktubre 30 nga Barangay and Sangguniang Kabataan Elections (BSKE) nga indi magkadto sa venue.
Una man nga gin-athag sang Comelec nga ang pagkadto sang kandidato sa sini nga mass gatherings ang posible mangin ground sang disqualification bangud makabig ini nga premature campaigning nga makabig nga election offense.
Natalana ang campaign period sa eleksyon sa Oktubre 19-28.
