Gin-deklara na ni Presidente Rodrigo Duterte nga si Taguig City Representative Alan Peter Cayetano ang iya suportahan sa pagka-Speaker sa House of Representatives.
Suno kay Duterte, gintinguhaan niya nga indi na maghilabot pa sa speakership race apang ini na ang tion agud nga makapabutyag siya sang iya naluyagan sa nasambit nga pwesto.
Si Cayetano ang nangin running mate sang Presidente sang 2016 elections kag anay Department of Foreign Affairs (DFA) Secretary.
Dugang pa sang Presidente, ang luyag niya nga mangin masunod nga majority leader amo si Leyte Representative Ferdinand Martin Romualdez.
Samtang suno naman kay Presidential Spokesman Atty. Salvador Panelo, si Cayetano ang maga-serbe bilang top House leader sa una nga 15 ka bulan kag sa masunod nga 21 ka bulan, ang mangin speaker amo si Marinduque Representative Lord Allan Velasco.
Pahayag ni Panelo, ang tatlo ka mga kandidato ang naghingyo sang bulig kay Duterte agud nga mahitso kag makaayo ang away sa tunga sang mga nasambit nga persona.
Nagpabor man sanday Cayetano, Velasco kag Romualdez nga ila respetuhon ang desisyon sang Presidente.
Ang mga bag-o nga opisyales sang Kamara ang pili-an sa pagbukas sang 18th Congress sa Hulyo 22 kadungan sang ika-apat nga State of the Nation Address (SONA) sang Presidente.
Gin-athag man ni Duterte nga si Cayetano ang pinaka-una nga kandidato nga nagpabutyag sa iya nga luyag nga mangin speaker.
Gani, na desisyonan sang Presidente nga mag term-sharing na lang bangud iya ini nga mga abyan kag may utang ini nga kabalaslan.
Ginpakigbahin man ni Duterte sa publiko nga wala naka-istorya sa iya si Davao City Representative Isidro Ungb nga kandidato naman ni Sara Duterte sa pagka-Speaker.
