ILOILO – Wala nagkulang ang Simbahan sa pagpahanumdom sa mga tawo nga tatapon sang husto ang mga kabukiran agud malikawan ang kalamidad kaangay sang lapnagon nga baha kag landslides.
Sa interview sang Bombo Radyo kay Msgr. Meliton Oso, director sang Jaro Archdiocesan Social Action Center kag isa man ka environmental advocate, iya ginpahayag nga madugay na nga nangin “matunog ang tingog” sang simbahan agud tawgon ang atensyon sang mga tawo nga nagahalit sa palibot.
Isa sa ginbalikan ni Oso amo ang pagsulod sang BT corn variety sa Iloilo nga amo man ang gin-introduce bilang bantog nga alternatibo nga pananum sang mga mangunguma sa Northern Iloilo.
Suno kay Oso, apisar nagpanindugan ang ila grupo nga magahalit ini sa ikaayong lawas kag magakalbo sa kagulangan, wala sila makalusot sa committee level sa Sangguniang Panlalawigan bangud sa pagpamatok sang mga board members sang una.
Suno kay Oso, sa baylo nga pamatian, gintawag pa sila nga “alarmist, anti-development, kag anti-people” sang tion nga nagapadulong sila sa mga banwa sa Quinto Distrito agud iduso ang ila kawsa.
Sang una suno kay Oso, lunsay pa mga kahoy ang yara sa kabukiran sa Northern Iloilo kag madamo man ang tree planting activities.
Subong, lunsay na mais ang nakatanum sa mga bukid.
Bangud sini suno sa iya, gina-eksperyensya na sang mga tawo subong ang lapnagon nga baha, pagkaptiphag sang duta, kag iban pa nga mga kalamidad nga tanan bunga kahimuan sang mga tawo.
“Take care of our common home, this is the only home we have,” pahayag ni Oso. Pahayag pa niya, sa sini nga sitwasyon kag sa pag-abot sang mga kalamidad, mga imol ang nagasuprer.
Kaangay sang kampanya kag long-term solution sang Iloilo Provincial Government, nagapanawagan man si Oso nga buylugan ang mga tree planting activities, pagtukod sang nurseries, pag-suporta sang organic farming kag iban pa nga makabulig sa palibot.
