Nagapadayon ang pagpakigdayalogo sang Afghan Taliban officials sa Japanese official bilang kabahin sang pagtinguha sang Tokyo nga buligan ang Afghanistan sa pagtukod sang isa ka mas inklusibo nga pampulitika nga sistema kag sa pagprotekta sa tawhanun nga kinamatarung.
Ini ang una nga nakumpirma nga diplomatic trip sang Taliban sa gwa sang rehiyon sang Central Asia-Middle East humalin sang nakuha nila ang kontrol sa Afghanistan sang 2021.
Suno kay Bombo Josel Palma, gin-imbitahan ang mga opisyal sang Taliban sang grant-making organization nga Nippon Zaidan.
Natalana man sila nga makigsapol sa mga opisyal sang Japanese Foreign Ministry.
Sa isa ka statement, ginpahayag sang Nippon Zaidan nga katuyuan sang pagbisita nga ipahangop sa Taliban ang importansya sang mas masangkad nga panan-awan sa nation-building kag ang pagbaton sang humanitarian assistance gikan sa international community para sa mga nagakinahanglan.
Nahibaluan nga wala ginakilala sang Japan bilang opisyal nga gobyerno sang Afghanistan ang Taliban.
Isa sa nagapanguna nga nagaupang sa pagkilala sa Taliban bilang lehitimo nga gobyerno ng Afghanistan amo ang ila nga paglimita sa kinamatarung sang kababaihan kag mga kabataan nga babaye.
Una nga ginsapubliko ni Latif Nazari, deputy economy minister sang Taliban nga ang amo nga byahe sang “high-level delegation” sang Taliban ang nagatuyo nga makatukod sang koneksyon bilang aktibo nga myembro sang international community.
