“Matuod kag indi propaganda lang” ang mga report nga tuman ka pintas ang Taliban nga grupo kag ginapang-pwersa sang katapo sini ang lamharon nga mga babayi agud pakaslan ang Taliban fighters.
Una na nga nagpa-gwa sang pahayag ang Taliban spokesperson nga si Suhail Shaheen nga ‘totally wrong’ kag ‘poisonous propaganda’ ang statement nga ginapilit sang Islamic Emirate of Afghanistan ang mga bata nga pamanahon ang katapo sang militante nga grupo.
Sa exclusive interview sang Bombo Radyo Iloilo sa Afghan Journalist nga si Mir Wais Jalalzai direkta sa Kabul City, iya ginpahayag nga indi mapatihan ang Taliban sa bisan diin nga aspeto bangud una na ini nga natabo sa norte nga bahin sang pungsod.
As of press time suno kay Jalalzai, wala pa ini natabo sa Kabul City.
Apang pahayag niya, indi gihapon malimtan nga may mga 25-40 ka tawo nga ginpangpatay ang Taliban lakip na diri ang isa ka komedyante nga ginpatay mismo sa atubang sang iya mga anak.
Wala man sang kaluoy suno sa iya ang ginabanta 50,000 – 70,000 ka mga Taliban militants sa mga soldado nga nagasungka sa ila.
MAPATIHAN BALA ANG PROMISA SANG TALIBAN?
Nahibaluan nga una na nagpasalig ang Taliban sang kalinong kag normal nga kabuhi para sa nagatrabaho sa previous Afghan government kag nagpromisa man sang kahilwayan sa mga babayi agud nga makatrabaho.
Kasunod sini, nagpahayag sang duda ang United Nations bangud pahayag sang UN, buron ini nga promisa kun basehan lang ang maragtas sang Taliban.
Sa bahin naman sang International Criminal Court (ICC), nagpahayag ang chief prosecutor nga gina-monitor sang husto ang hitabo sa Afghanistan bangud sa nagadamo nga reports nga may mga kapintas kag paglapas sa international humanitarian law.
Lakip diri ang extrajudicial executions paagi sa revenge killings sa detainees kag mga indibiwal nga naga-surrender, persecution sa women and girls, krimen batok sa mga kabataan, kag iban pa nga krimen nga nagaapekto sa ‘civilian population at large’. ##
