Kanselado ang kinaandan nga pagtaltal sa Byernes Santo kadungan sang pagselebrar sang Semana Santa sa Barotac Viejo, Iloilo.
Sa interview sang Bombo Radyo kay Mayor Nielo Tupas, iya ginpahayag nga agud malikawan ang pagtimbuok sang kaso sang COVID-19, kanselahon anay ang mga nakaandan nga aktibidad para sa Semana Santa sa ila banwa.
Suno kay Tupas, ikaduha na ini nga tuig nga kanselado ang pagtaltal sa diin ginapatigayon ang re-enactment sang pagkapatay ni Hesukristo.
Pahayag ni Tupas, apisar sini, madayon sa gihapon ang prusisyon apang ini ang mobile ukon patigayunon pinaagi sa paglibot sang mga salakyan kag iparada ang mga Santos.
Madayon man suno kay Tupas ang pila ka mga misa kadungan sang Semana Santa apang nagakadapat nga matuman ang tanan nga health protocol.
Dugang pa sang alkalde, apisar layo na sa kinaandan ang pagselebrar sang Semana Santa, apang pinaagi sa pagbuligay sang tanan, ginalauman nga mas mapadasig ang pagtapna sang COVID-19.
Nagpanawagan man ang alkalde sa iya pumuluyo nga sa pagselebrar sang Semana Santa, gamiton ini nga tion agud magpamalandong kag magpasalamat sa kabuhi nga ginhatag sang mahal nga makaako.
