Indi hungod nga sahi sang mga kawatan ang mga indibidwal nga may balatian nga kleptomania.
Sa interview sang Bombo Radyo kay Johnrev Guilaran, clinic psychologist, kag professor sa University of the Philippines (UP) Visayas, iya ginpahayag nga ginakontrol ang mga kleptomaniac sang indi mapunggan nga impulses ukon huyog nga nagaresulta sa pagpangawat.
Apang ipaanggid sa mga kawatan, indi planado ang pagpangawat sang mga may balatian nga kleptomania kag wala ang mga ini nagakuha sang mga bagay bangud sa kaakig ukon pagbalos.
Bag-o magpangawat, nagakabatyag man ang mga ini sang indi makontrol nga pagsaka sang tensyon kag anxiety, kag kun makuha na ang mga bagay nga ila nakursunadahan, nagakabatyag ang mga ini sang guilt ukon konsensya kag relief ukon kaumpawan.
Sa tion sang kabudlayan ukon sa ‘stressful events’ naga-trigger ang urge sang kleptomaniacs nga magpangawat sa diin pulos random nga bagay ang ila ginakuha kasubong sang relo, butones, hairpins, lipsticks, bisikleta kag iban pa.
Suno sa eksperto, naga-manifest ini nga balatian sa mga naga-edad lima tubtob walo ka-tuig pagkatapos sang na-eksperyensyahan nga psychotrauma kag mas common ini nga masakit sa mga kababainhan ipaanggid sa mga kalalakihan.
Paathag ni Guilaran, ginatunaan sang sini nga impulse control disorder ang indi balanse nga chemicals sa utok sang tawo nga ginatawag nga ‘neurotransmitters,’ nga kabangdanan sang major stress.
May yara man sang iban pa nga mental disorders ang mga tawo nga may kleptomania sa diin ang pinaka-common diri amo ang depression, anxiety, eating disorders kag substance abuse disorders.
Agud mabulong ang ini nga sahi sang balatian, nagakadapat magpaidalom ang mga pasyente sa psychotherapy — isa ka sahi sang counseling nga nagatutok sa behavior management.
