GHANA – Kapin sa tatlo na ka semana nga ginapatuman ang lockdown sa Accra, Ghana bangud sa Coronavirus Disease 2019 (COVID-19).
Suno kay Bombo International Correspondent Elma Setenta, mahimo nga sa masunod nga inadlaw, ipatuman na gid ang total lockdown sa Acrra kag ginalauman naman ang quarantine extension sa bug-os nga Ghana.
Bangud sini, sirado na ang tanan nga border sang Ghana apang ginapahanugutan sa gihapon ang pagguwa sa balay kun may yara sang quarantine pass.
Ginpahayag ni Setenta nga bukas sa gihapon ang pila ka mall sa Accra apang sirado naman ang iban nga commercial establishment kasubong sang money remittance center.
Madamo ang mga pulis kag suldado nga nagabantay sa palibot kun sa diin bisan ang mga may yara sang quarantine pass nga tuyo kun tani nga magpamalaklon ang ginasaway kag ginapapauli.
Kasubong sa Pilipinas, halos nagdoble ang presyo sang facemask kag alcohol bangud sa panic buying ilabi na sang naglapta na ang tuhoy sa COVID-19.
May yara man sang libre nga water kag food packs nga ginhatag ang gobyerno sang Ghana ilabi na sa mga homeless ukon wala sang balay.
Indi man malikawan suno sa natungdan nga may yara sang diskriminasyon bangud nga ginatawag nga Chinese ang mga Filipino sa Ghana.
Sa subong suno kay Setenta, nagahulat siya kun san-o matapos ang lockdown agud nga makapauli sa Guimaras.
