Gin-anunsyo sang International Boxing Association (IBA) nga magahatag ini sang premyo nga kuwarta indi lamang sa Olympic champions kundi sa tanan nga medalists sa Paris Games.
Ini apisar nga wala man ini naga-organisar sang boxing tournament sa Paris Olympics bangud ginkakasan sang recognition sang International Olympic Committee (IOC) sang nagligad nga tuig.
Apang suno sa IBA, magahatag ini sang $100,000 ukon P5.85-million sa gold medalists, $50,000 ukon P2.9-million sa silver medals kag $25,000 ukon P1.46-million sa bronze.
Ini nga tikang ang kasunod man sang ginpahibalo sang World Athletics nga sila ang mangin labing-una nga governing body nga magahatag sang $50,000 ukon P2.9-million nga prize money sa Olympic champions nga magasugod sa Olympiada sa Paris sa Hulyo.
Sa IBA naman, ang total prize money fund commitment ang masobra sa $3.1 million kag ipanagtag sa masobra 100 boxers.
Apang wala gin-abi-abi sang IOC ini nga desisyon bangud ginsiling nga wala sang financial transparency sa sini nga tikang. Suno pa sa committee, indi maathag kun sa diin halin ang kuwarta kag ang kakulang sang financial transparency ang isa sa mga rason kun ngaa wala na ginkilala sang IOC ang IBA.
Sang Hunyo sang nagligad nga tuig, ang ginsaad nga rason kun ngaa gin-withdraw sang IOC ang recognition sa IBA amo nga napaslawan ini nga makumpleto ang reforms sa governance, finance kag ethical issues.
