Wala sang face to face classes sa tanan nga lebel sa Iloilo City sa Enero 24(subong nga Biyernes) kag sa Enero 27(Lunes).
Ini matapos nga gin-amyendaran ni Mayor Jerry Treñas ang Executive Order No. 011, series of 2025 nga naga-suspend sang face-to-face classes kadungan sang selebrasyon sang Dinagyang Festival.
Matandaan nga sa una nga Executive Order sang alkade, pre-school tubtob senior highschool lang ang sakop sang class suspension.
Una nga ginkansela ang klase sa pila ka eskwelahan nga gin-gamit bilang billeting area sang mga nagpasakop nga tribu sa Kasadyan sa Kabanwahan.
Sa bahin naman sang Department of Education- Iloilo, ginpahayag ni Dr. Maria Luz delos Reyes, Superintendent sang Schools Division of Iloilo City, nga sa pihak sang class suspension, ginapasiguro niya nga indi ini makaapekto sang dako nga pagtuon sang kabataan.
Suno kay delos Reyes, mahimo gihapon magpatigayon sang modular learning ukon online lang.
Gin-athag man niya nga apisar wala sang face to face classes, bukas ang mga eskwelahan kag present gihapon ang tanan nga personnel sang mga eskwelahan.
