GUIMBAL, ILOILO – Ginakabig nga Persons Under Monitoring ang tanan nga residente sang Guimbal, Iloilo bangud sa Coronavirus Disease 2019 (COVID-19).
Ini ang kasunod sang kumpirmasyon sang Department of Health nga may yara sang localized transmission sang viral disease kun sa diin naglab-ot na sa 18 ang kumpirmado nga kaso sang COVID-19 sa Western Visayas.
Bangud sini, ang tanan nga residente ang dapat nga magsunod sa 14-day quarantine.
Sa interview sang Bombo Radyo kay Dr. Jay Dorin, Municipal Health Officer sang Guimbal, Iloilo, iya ginpahayag nga duha na ang kaso sang COVID-19 sa nasambit nga banwa matapos nga nalatnan ang Patient #18 nga amo ang 51 anyos nga babayi nga kabulig sang Patient #2.
Suno kay Dorin, asymptomatic ukon wala sang sintomas sang COVID-19 ang kabulig apang nagguwa sa contact tracing nga isa siya sa mga pasyente nga nagpositibo sa nasambit nga virus.
Ginpahayag ni Dorin nga nagapaidalom sa home quarantine ang kabulig kag yara sa estable nga kondisyon.
Protocol na suno sa natungdan nga kun may yara sang local transmission sang viral disease, automatic nga ginakabig nga Persons Under Monitoring ang tanan nga residente sang isa ka lugar.
