Patal nga pilas tuga sang sang pagka-igo sang bala sa likod ang natumod nga gintunaan sang pagkamatay sang naluthangan nga lalaki sang ginpatigayon sang mga pulis ang drug buy bust operation sa North Baluarte, Molo, Iloilo City.
Ang biktima amo si Karl Dannielle Bolante, 27, kag residente sang nasambit nga lugar.
Santo man sa nagwa nga resulta sang paraffin test, negatibo man si Bolante.
Nahibaluan nga katuyuan sang paraffin test nga makumpirma kun may presensya sang gun powder residue ang mga kamot sang biktima kag kun naggamit ini sang armas-luthang.
Sa interview sang Bombo Radyo kay Amalia Bolante, iloy sang biktima kag isa man ka Barangay Kagawad sa North Baluarte, Molo, Iloilo City, iya ginpahayag nga maathag nga inosente ang iya nga anak baliskad sa alegasyon sang mga pulis nga may bitbit ini nga armas-luthang sang natabo ang insidente kag naghana pa nga magpanghaboy sang granada.
Dismayado man ang iloy sa Molo Police Station bangud kun indi tungod sa Bombo Radyo, wala pa niya nahibaluan nga nagwa na ang resulta sang autopsy kag parrafin test sang iya anak.
Gin-athag man sang Barangay Kagawad nga indi sila magpa-areglo bangud inhustisya nga makabig ang ginhimo sa iya anak nga si Karl.
Suno sa iloy, mabaton pa sang ila pamilya kun gin-ako sang mga pulis nga nasalabat lang ang iya anak sa ginpatigayon nga drug buy-bust operation.
Apang sa baylo suno sa natungdan, ginhimuan pa sang istorya ang iya anak nga may bitbit ini nga pusil kag granada sang natabo ang insidente sa diin wala gani sila sang ikasarang agud nga makaangkon sang mga armas-luthang.
”Sang permiro pa lang nga daan, kun gin-istorya ko nila nga amo na nasalabat lang, wala na sang planted planted…Mabaton, mabaton gid namon kay indi kami mabudlay istoryahon kag nakita man namon nga indi hungod…Mapasensya gid namon bisan pa nga sakit para sa amon… Galing kay amo na bala himu-himuan pa ang bata mo sang indi manami nga istorya, may granada, may pusil, ay nano na ya…indi kami kasarang na ya…”
