Hugot nga ginapamatukan sang mga drivers sang Trisikad Association sa Barangay Boulevard, Molo, Iloilo City ang plano sang gobyerno nga ipaidalom ang Iloilo City sa Enhanced Community Quarantine (ECQ) status.
Sa interview sang Bombo Radyo kay Arthur Pareya, presidente sang Trisikad Association sa nasambit nga lugar, iya ginpahayag nga ginakahangaw-an nila nga maliwat na naman ang mapin-ot nga sitwasyon sang ginpatuman ang ECQ sa syudad sang nagligad nga tuig.
Suno kay Pareya, kagutom kag pagkadula sang ila nga kita ang ila naangkon sang panahon sang ECQ rason nga indi na nila ini luyag nga maliwat pa.
Pahayag pa niya, kuntani maluoy man ang gobyerno sa ila nga mga kubos bangud ang pagbyahe sang trisikad, amo gid lamang ang ila nga palangabuhian kag kun ipatuman ang ECQ sa syudad, pat-od nga wala na sila sang kwarta nga iduhol sa ila pamilya.
‘MAPIN-OT NGA SITWASYON’
Samtang, para naman sa punong barangay sang Boulevard, Molo, Iloilo City, tuman ka hapdi ang plano sang gobyerno nga pahugtan kag dumilian ang tanan nga negosyo sa tion nga ipatuman ang ECQ sa syudad sang Iloilo.
Sa interview sang Bombo Radyo kay Punong Barangay Virgilio Villanueva, iya ginpahayag nga kapin 8,000 ka mga pumuluyo niya ang maapektuhan sa tion nga ipatuman ang pinakahugot nga quarantine classification sa syudad.
Suno kay Villanueva, kadam-an sa iya mga pumuluyo ang lunsay mga vendors kag negosyante rason nga pat-od nga madulaan ang mga ini sang trabaho kag kita sa tion sang ECQ.
Pahayag sang opisyal, indi man siya ka batas nga indi pagbuligan ang iya mga pumuluyo apang indi man siya makasarang nga maghatag sang nagakaigo nga bulig para sa tanan.
Bangud sini, nagpanawagan ang opisyal sa gobyerno nga kuntani binag-binagon anay ang mangin epekto sa kadam-an bag-o desisyunan ang pag-istrikto sa mga pagsulundan.
