ILOILO CITY – Ginapanindugan sang tanod member nga nakaluthang patay sa Sooc Arevalo nga gindepensahan gid lamang sini ang iya kaugalingon matapos ginsumbag kag ginhana nga bun-on sang biktima nga si Salvador Malaya, 36 anyos sang Calajunan Mandurriao.
Sa interview sang Bombo Radyo kay Tanod Member Noel Mana-ay sang Sooc Arevalo, ginpahayag sini nga hubog nga nagasinggitan ang biktima kaupod ang isa ka Wilmer Silla nga naghalin sa videokehan gani iya ini ginsaway.
Imbes magpamati, ginsaruso pa siya sang biktima kag ginsumbag sa diin naigo ini sa iya ulo kag natumba.
Ginpahayag dugang sang tanod nga nagpahayag pa ang biktima nga bun-on ini gani iya nalang gin-unahan.
Naigo ang biktima sa dughan tuga sang 12 gauge home made single shot nga armas nga gingamit sang tanod.
Natabuan man nga nakalabay sa lugar ang traysikol nga ginasakyan ni Maricar Labrador sang Sooc Arevalo gani na lapsan ini sang balinis sang bala nga nag-igo naman sa iya paa.
Samtang sa pinakaulihi nga pagtsekyar sang Bombo Radyo sa kahimtangan ni Labrador, ipaidalom ini sa operasyon sa Western Visayas Medical Center agud makuha ang balinis nga naglubong sa paa sini.