Gin-aprubahan sang local prosecutors ang pag-file sang kaso-kriminal batok sa barangay tanod nga ginaalegar nagpatay sa golden retriever nga si Killua sang Marso subong nga tuig.
Gin-indict sang prosecutors ang barangay official nga si Anthony Solares sa idalom sang Animal Welfare Act of 1998. Ang indictment nagakahulugan may nakita nga probable cause kag ipasaka na ang kaso sa korte.
Kun mapamatud-an nga guilty ang isa ka tawo sa animal abuse sa idalom sang amo nga layi, presuhon ini sa sulod sang isa ka tuig, anum ka bulan, kag isa ka adlaw bilang minimum kag tubtub sa duha ka tuig kag multa nga indi maglapaw sa P100,000.
Sang napatay ang amo nga ido sang Marso, wala tuo nga mga grupo kag animal welfare advocates ang nagkondena sini.
Nakita sa closed circuit television (CCTV) footage nga ginlagas ni Solares si Killua samtang may dala ini nga kahoy, kag sunod naman nga nakit-an sang tag-iya nga si Vina Rachelle Mary Arazas nga wala na sang kabuhi ang iya hinuptanan kag nakasulod pa sa sako.
Nagdepensa anay ang barangay tanod nga ginkagat siya ni Killua kag gin-atake ang iban pa, apang nagapati ang prosecutors nga wala ini naga-justify sa akto nga pagpatay sang ido.
Magluwas sa animal abuse complaint, ginpasakaan man anay sang reklamo si Solares kaangot sa anti-rabies act bangud gin-alegar gindala sini ang ido sa slaughterhouse kag dog meat cooking area bangud nagapanag-iya ini sang karinderya business nga nagabaligya sang karne nga sud-an malapit sa dog slaughter area. Ini nga complaint ang gin-basura sang prosecutors bangud sa kakulangan sang ebidensya.
