ILOILO CITY – Nadakpan na ang tanod nga nagtiro sang pangayaw sa Barangay Bagacay, Pototan, Iloilo.
Ang suspek amo si Ian Pedroso, 50, barangay tanod sang nasambit nga barangay.
Ang biktima amo si Michael Ryan Mendoza, 38, may asawa kag residente sang Barangay Guinacas, Pototan.
Sa interview sang Bombo Radyo kay Police Major Roy Tayona, hepe sang Pototan Municipal Police Station, iya ginpahayag nga nadakpan ang suspek sa Barangay Dawis, Pototan, Iloilo pinaagi sa hot pursuit operation.
Una na nga ginpahayag ni Tayona nga nagtukod sila sang duha ka tracking teams agud nga madakpan ang suspek.
Kun balik-balikan, sa kuha sang closed circuit television sang barangay, sakay sa motorsiklo ang biktima kag nagpundo sa tyangge sang asawa sang suspek sang hinali lang nga ginpalapitan sang barangay tanod kag gintiro.
Samtang, estable na ang kondisyon sang biktima nga nagapabilin sa ospital matapos nga nakaagum sang pilas sa liog nga naglusot sa iya nawong.
Sa subong, ginahitso na sang kapulisan ang pagkuha sang affidavit sang asawa sang suspek agud nga ma-establish sang maayo ang imbestigasyon.
Kahapon, yara sa sulod sang iya tyangge ang asawa sang suspek kag nagahigda samtang nga wala pa sang kustomer.
Base sa pinakaulihi nga imbestigasyon sang kapulisan, personal grudge ang ginalantaw nga motibo sa krimen bangud sang 2019, may daan nga hiligut-anon ang duha.
