Ginbuno-patay sang pamatan-on ang isa ka barangay tanod sa Zone 1-B, Barangay San Juan, Molo, Iloilo City.
Ang biktima amo si Michael Barredo, 38-anyos, residente sang Zone 2 sang amo nga barangay.
Ang mga suspek amo sanday Carlo Lacquin, sang South Baluarte, Molo kag Philip John Sanico sang Zone 1B, San Juan, Molo.
Sa interview sang Bombo Radyo kay Jon Enojado, Barangay Kagawad sang nasambit nga Barangay, iya ginpahayag nga nagresponde ang tanod sa baybay kun sa diin may gin-report nga may nagarambol kag nagahabuyanay sang bato nga mga kabataan.
Suno man sa impormasyon nga nakuha sang natungdan, ginsaway sang tanod ang kabataan kag ginaalegar nga nakapatupa ang tanod sa isa kag didto na nga ginbalusan, ginlagas kag ginbuno sang suspek.
Nag-agum naman sang pilas sa abaga kag likod ang biktima.
Gilayon naman nga nadakpan ang mga suspek kasunod sang ginpatigayon nga hot pursuit operation sang kapulisan.
