ILOILO CITY – Madinalag-on nga ginpatigayon sang Iloilo Provincial Government ang province-wide Tanum Iloilo sa Hunyo 2022: Tree Growing for Food Security and Public Safety.
Ini ang dungan nga ginpatigayon sa BIKE.HIKE.PLANT+ 2022 nga programa sang Department of Environment and Natural Resources (DENR), 159th Philippine Forestry Service Anniversary kag Arbor Day.
Sa interview sang Bombo Radyo kay Mitzie Peñaflorida, Senior Environmental Management Specialist sa Iloilo Provincial Environment and Natural Resources Office (PENRO), iya ginpahayag nga ang kick-off ceremony ang ginpatigayon sa watershed sang Brgy. Daja, Maasin, Iloilo.
Ang nasambit nga programa ang personal nga gin-updan nanday Iloilo Governor Arthur Defensor Jr.; Assistant Secretary for Indigenous Peoples Affairs Jose Ong; Forest Management Bureau (FMB) Director Tirso P. Parian, Jr. kag ang bilog nga DENR-Region VI kag Regional Coordinator for Visayas from the Office of the President nga si Junel Buhat.
Suno kay Peñaflorida, nagdangat sa masobra 2, 000 ka mga native nga kahoy ang natigayon nga matanum kadungan sang aktibidad.
Ang Tanum Iloilo sa Hunyo 2022 ang gindihon pinaagi sa Executive Order No. 305 nga ginpagwa ni Governor Defensor.
Ang programa ang naga-tap sa mga nagkalain-lain nga mga national agencies (NGAs), Local Government Units (LGUs), non-government organizations (NGOs), people’s organizations kag iban pa.
Samtang, magapadayon ang implementasyon sang province-wide Tanum Iloilo sa Hunyo 2022 tubtob nga malab-ot ang target nga 1.5 million nga seedlings ang matigayon nga matanum antes magtapos ang 3rd quarter sang tuig.
Suno kay Peñaflorida, target sang programa amo ang mga uphill area agud nga malikawan ang pag-usmod sang duta padulong sa low land area.
Nagaplano naman ang probinsya nga magsapol sa mga corn farmers sa quinto distrito nga nagpahayag na sang ila pagsuporta sa sini nga programa.
Dugang pa ni Peñaflorida, may yara sang naka-designar nga personnel nga naga-monitor sa sini nga programa.
Sa mga barangay kag kabanwahanan nga nagaplano nga magtanum apang wala sang seedling, mahimo nga mag-reaquest sa central nursery sa banwa sang Maasin kag may yara sang center sa tagsa ka distrito nga may yara sang mga seedlings nga libre nga ginahatag sang probinsya.
