Pormal na nga gin-inagurahan ang Tanza Esperanza People’s Center kahapon, Abril 28, sa pagpanguna ni Iloilo City Lone District Representative Julienne Jam Baronda.
Suno kay Cong. Baronda, matapos ang pila ka mga pagpanghangkat nga gin-atubang sang proyekto, natigayon sa gihapon nga natapos ang People s Center.
Ini nga establisyamento amo ang magaserbe man nga evacuation center sa tion sang emerhensya indi lang sang mga residente sang Brgy. Tanza Esperanza, apang sang mga malapit man nga mga kabarangayan.
Lakip man sa nasambit nga proyekto ang igahatag nga kahigayunan sa mga indibidwal nga nakatapos na sa drug rehabilitation nga pagahatagan sang kapital kag ginhatagan man sang espasyo sa People’s Center agud nga makabaligya kag liwat nga makabangon sa ila tagsa ka kabuhi.
Nahibaluan nga may ara man ang building sang 50-kilowatt solar panel system nga magasiguro sang padayun nga suplay sang kuryente sa tion sang emerhensya, ilabi na subong nga mataas pa ang presyo sang mga produktong petrolyo.
Sa interview naman sang Bombo Radyo kay Mylet Tribunal, residente sang Tanza Esperanza, iya ginpahayag nga apisar nga natapos na ang proyekto, naghatag pa sang kasiguraduhan ang kongresista sa ila nga may igadugang pa ini agud nga mas mag-ayo pa ang People’s Center.
Dako naman ang pagpasalamat sang mga residente kay Congresswoman Jamjam Baronda, subong nga natapos na gid ang proyekto matapos ang pila ka tuig.
