Natapos na sang Pinoy boxer nga si Marlon “The Nightmare” Tapales ang iya paghanas sa training camp sa Pilipinas para sa balantayan nga unification bout sini batok kay Naoya “The Monster” Inoue sang Japan.
Ginpabugal man sang head coach sini nga si Ernel Fontanilla nga 101% na nga handa si Tapales para sa sambuwa batok sa undefeated Japanese boxing superstar sa Disyembre 26 sa Ariake Arena.
Ang magadaog sa pag-atubangay sang duha amo ang magabitbit sang International Boxing Federation (IBF), World Boxing Association (WBO), World Boxing Council (WBC), kag World Boxing Organization (WBO) world super bantamweight belts.
Suno naman kay Tapales, apisar nga underdog siya batok sa ginakabig “Monster” sa boxing ring, wala na siya namag-uhan nga mangayaw sa balwarte sang iya kasumpong.
Nagapati man ang kampo sang Pinoy boxer nga makahimo ini sang upset batok kay Inoue kag pananglitan matabo ini, makuha sini ang respeto indi lamang sang Pilipinas kundi sang iban nga mga pungsod.
“I don’t care about the odds. I have been an underdog all my life. I have fought on my opponent’s home soil and I have handled them well,” suno kay Tapales, 31, nga tumandok sang Tubod, Lanao del Norte.
Subong nga adlaw, Disyembre 19, magabiya na ini sa Pilipinas kag magapadulong sa Japan agud magtinguha nga makahimo sang maragtas bilang labing-una nga undisputed champion sang pungsod.#(Photo: WBO)
