Nakatilaw na liwat sang matam-is nga kadalag-an ang anay two-division champion nga si Marlon Tapales matapos naagaw sang undefeated Japanese superstar nga si Naoya Inoue ang iya nga WBA kag IBF super-bantamweight titles paagi sa 10th-round knockout sa undisputed championship fight sa Tokyo, Japan sang nagligad nga tuig.
Nahimo ini sang Pinoy boxer matapos gintumba sa una nga round si Nattapong Jankaew sang Thailand kag nabulsa ang WBC Asian Continental super bantamweight title kagab-i, Mayo 10, sa Pasay.
Una nga na-knockdown sang Lanao del Norte pride ang Thai boxer paagi sa iya nga clean right hook sa 1:59 mark sang first round. Wala pa isa ka minuto ang nagligad, liwat ini nga natumba bangud sa left hook sang 32-anyos nga si Tapales.
Sa 2:15 nga marka sang amo man nga round, ang uppercut ni Tapales ang nagtumba pa liwat kay Jankaew kag amo na ang dalayon nga nagtapos sa sambuwa.
Nabatak sini ang professional boxing record ni Tapales sa 38-4 nga may 20 knockouts samtang nanaog naman ang record ni Jankaew sa 12-4 nga may 8 knockouts.
Plano ni Tapales nga magbalik sa world championship picture kasunod sini nga kadalag-an sa atubang sang Pinoy fans.
Sa co-main event sini nga sambuwa, nalutos ang isa man ka former world title challenger nga si Reymart Gaballo sa kamot sang Mexican nga si Kenbun Torres. Nauntat man ang hampang sa Round 1 matapos tatlo ka beses man nga natumba si Gaballo.#
