Nagsaka sa P12.29 ang taripa sang kuryente sa mga konsumidor sang Iloilo Electric Cooperative (ILECO) 2 sini nga bulan sang Agusto.
Sa interview sang Bombo Radyo kay ILECO 2 General Manager Engr. Jose Redmond Eric Roquios, iya ginpahayag nga ini ang kasunod sang wala pa nakaayo nga high voltage submarine cable sang National Grid Corporation of the Philippines (NGCP) nga naguba samtang nagapatigayon ang Department of Public Works and Highways (DPWH) sang dredging kag re-channeling sa Bio-os River sa Barangay Jagna, Amlan, Negros Oriental.
Bangud sini, nagnubo ang suplay sang kuryente nga naga-interconnect sa tunga sang Negros kag Cebu Islands.
Suno kay Roquios, santo sa ila pagpakig-angot sa NGCP, may mga technical expert na sila halin sa abroad nga ginakonsulta agud mapadasig ang pagkaayo sang high voltage submarine cable.
Plano naman sang ILECO 2 nga magbakal sang power supply nga may subsidized rate sa Power Sector Assets and Liabilities Management Corporation (PSALM) sang kuryente agud nga mapanubo ang presyo sang kuryente per kilowatt hour.
Samtang sa bahin naman sang Iloilo Electric Cooperative (ILECO) 1, wala sang pagtaas sa taripa sang kuryente.
Sa interview sang Bombo Radyo kay Engr. Mike Paguntalan Jr., General Manager sang ILECO 1, iya ginpahayag nga bangud nakakuha sila sang emergency purchase nga good for 1 year, nangin bastante ang suplay nila sang kuryente.
Pahayag niya, ini ang rason kun ngaa napreparahan nila ang ini nga isyu bangud naeksperyensyahan na nila nga nagsaka sa P60.00 per kilowatt hour ang residential rate sang kuryente.
