ILOILO CITY – Ginhingadlan sang pinuno sang Task Force on Anti-Squatting and Illegal Structures Unit ang pila ka mga barangay sa syudad sang Iloilo nga makabig failure sa validation sang Oplan Hawan.
Sa interview sang Bombo Radyo kay Love Joy Hosenilla, pinuno sang Task Force on Anti-Squatting and Illegal Structures Unit, iya ginpahayag nga lakip sa mga barangay nga nakitaan sang low compliance amo ang Quintin Salas, Bitoon kag Balabago sa distrito sang Jaro samtang ED Ganzon, Ortiz, Kahirupan, Kauswagan kag Ma. Clara naman sa City Proper.
Suno kay Hosenilla, indi sa gihapon mahinago nga madamo ang obstruction sa mga dalan magluwas pa gid sa mga barangay nga iya ginhingadlan.
Ginpahayag naman ni Punong Barangay Rizalino Salazar sang Ma. Clara, Iloilo City, nga isa sa problema sa ila lugar amo ang illegal parking.
Isa sa mga rason suno kay Salazar amo nga madamo ang commercial establishments nga nahamtang sa ila barangay.
Agud nga masolbar ang nasambit nga problema, ginahingyo sang Punong Barangay ang bulig sang Public Safety and Transportation Management Office.
