Ginpaidalum liwat sa reorganisasyon ni Mayor Raisa S. Treñas ang Task Force Boltahe pinaagi sa Executive Order No. 015 agud masiguro nga ang mga pasilidad sang syudad hilway sa ilegal nga koneksyon sang kuryente.
Suno kay Joy Fantilaga-Gorzal, tagpamaba ni Mayor Raisa S. Treñas sa interview sang Bombo Radyo, ginpahanumdom niya nga ang kabangdanan sang pag-reconstitute sang task force amo ang sunod-sunod nga sunog nga ginapatihan nga ginhalinan sang mga ilegal nga koneksyon sa mga linya sang kuryente sa mga pasilidad sang syudad.
Ginpahanugutan sang EO ang Task Force nga mag-imbestiga, mag-disconnect sang illegal nga koneksyon, kag magpasaka sang kaso batok sa mga responsable, upod ang pagkoordinasyon sa City Legal Office kag MORE Power.
Ginaplano man sang EO nga ang tanan nga gasto sang Task Force Boltahe kuhaon sa Discretionary Fund sang Alkalde, kag magalakip ini sang communication equipment, overtime pay, kag mga gastos sa dokumentasyon sang operasyon.
Ginapasiguro man sang alkalde nga ang pagpahamtang liwat sang Task Force Boltahe isa ka determinado nga tikang agud protektahan ang seguridad sang publiko kag matapna ang paglapta sang ilegal nga koneksyon sang kuryente sa Iloilo City.
