Maga-deploy sang dugang nga personnel ang Task Force on Moral Values Formation sa Esplanade 3 sa Nabitasan, La Paz, Iloilo City.
Ini kasunod man sang naaktohan sang green guard sang Garden of Love ang duha ka mga kalalakihan nga nagahimo sang kamala-malahan.
Sa interview sang Bombo Radyo kay Nestor Canong, Head sang Task Force on Moral Values Formation, iya ginpahayag nga antes paman natabo ang insidente, masami na sila nga nagalibot sa lugar kaupod man ang pila ka mga kapulisan.
Sapagkamatuod suno kay Canong, duha ka semana antes pa man natukiban ang duha ka lalaki, nagaronda na sila sa lugar.
Ginpahayag man sini nga ang tinutuyo sang pagdugang sang ila personnel sa lugar amo agud nga mapasangkad ang security measures kag indi na masulit pa ang hitabo.
Gin-ako naman ni Brgy. Nabitasan, La Paz Punong Barangay Barbara Joy Aroza nga sugod sang nag-pandemic, nagsugod man ang amo nga hitabo sa Garden of Love.
Suno kay Aroza, masami man makit-an ang mga bilin-bilin nga mga kagamitan ukon contraceptive nga gingamit man sang mga indibidwal.
Nagpasalig man ini nga padayon ang ila pagbantay kag paglagas sa mga masami nga nagapadulong sa lugar kag maghimo sang kamala-malahan.
Nahibaluan nga naaktohan mismo sang green guard kon paano niya nakit-an ang duha ka mga lalaki nga nagahimo sang kamala-malahan sa madulom nga bahin sang Garden of Love.
