ILOILO – Maga-umpisa na buwas nga adlaw ang pagserbisyo sang Task Force Operation Bulig Ilonggo nga pamunu-an sang Public Employment Service Office sang Iloilo Provincial Government.
Ini matapos nga napirmahan na ang Executive Order nga nagamandu sa pagtukod sang help desk nga may katuyu-an nga magbulig sa Overseas Workers Welfare Administration para sa mga madasig nga pagbulig sa Overseas Filipino Workers sa Middle East.
Sa interview sang Bombo Radyo kay Provincial Administrator Atty. Suzette Mamon, iya ginpahayag nga ang help desk ang ipahamtang sa lobby sang Iloilo Provincial Capitol kag may yara sang mga personnel nga magabantay.
Suno kay Atty. Mamon, pangunahan sang mga personnel sang Public Employment Service Office ang pagbantay sa help desk kag magabulig man ang mga personnel sang nanari-sari nga talatapan sa Iloilo Provincial Capitol kag nanari-sari nga ahensya sang gobyerno.
Ginpahayag ni Atty. Mamon nga sa help desk, mangin prayoridad ang mga pumuluyo sang probinsya sang Iloilo nga may yara sang himata sa Middle East nga apektado sang tensyon sa tunga sang Iran kag Estados Unidos.
Sa pagpangayo sang bulig, kinahanglan ang data agud nga madali nga mapakaig-angutan ang Overseas Filipino Worker nga luyag i-contact sang kliyente.
24/7 nga bukas ang help desk sa pagbaton sang mga kliyente nga maluyag mahibalu-an ang kahimtangan sang ila himata nga yara sa Middle East.
Mahimo nga magpadulong sang personal sa Iloilo Provincial Capitol lobby ukon magpakig-angot sa tagsa ka Municipal Public Employment Service Officer para sa dugang nga kasayuran.
