Ginatutukan sang Task Force Pis-anan ang lead kaangot sa “pesticide application” nga amo ang sa likod sang paglain sang pamatyag sang masobra 200 ka mga estudyante sa Barangay Pis-anan, Sibalom, Antique.
Sa interview sang Bombo Radyo kay Mr. Rodel Esler, head sang Sibalom Municipal Environment and Natural Resources Office kag ang Information Officer sang nasambit nga task force, iya ginpahayag nga base ini sa ila nagapadayon pa nga imbestigasyon subong samtang ginahulat man ang toxin test result.
Suno kay Esler, may mga claim ang iban nga mga indibidwal nga may nagpang-spray nga malapit lang sa eskwelahan, apang indi pa matumod kun sin-o ini kag ano nga pesticide ang iya gingamit.
Gindugang sini nga base sa chemist nga naka-istorya sang task force, kun mahaklo ang kemikal nga halin sa pesticide, magadalagan ini sa lawas sang tawo sa sulod sang 3-7 ka adlaw antes ma-release.
Kun madula naman ang bulong sa lawas sang tawo halin sa first aid ukon sa ospital, posible nga mabalik naman ang mga sintomas sa lawas sang apektado nga indibidwal.
Una na nga ginpahayag nga pito tubtub 10 ka adlaw man ang hulaton antes ang resulta sang toxin test nga ipadala pa lang sa Manila.
Ginklaro ni Esler nga wala na nila ginakonsiderar ang farmer nga amo ang una nagpanugid nga naka-spray man siya sang pesticide sa uma, bangud ang area kun sa diin ini nag-spray ang masobra otso kilometros ang kalayuon halin sa eskwelahan.
Matandaan nga nagaguwa sa inisyal nga impormasyon nga “daw baho sang luto nga bayabas” ang nahaklo sang mga indibidwal. May mga estudyante nga naka-guwa na sa balay-bululngan apang ginpangbalik liwat bangud sa paglain liwat sang pamatyag.#
