Nakatalana na nga iga-lift ang tatlo ka bulan nga fishing ban sa bilog nga Visayan Sea, suno sa Bureau of Fisheries and Aquatic Resources (BFAR).
Sa interview sang Bombo Radyo kay BFAR Regional Director Remia Appari, iya ginpahayag nga subong nga adlaw sang Domingo, Pebrero 15, 2026 ang ulihi nga adlaw sang nasambit nga tatlo ka bulan nga closed fishing season sa Visayan Sea, nga nag-umpisa sang Nobyembre 15, 2025.
Pagkatapos sang amo nga close fishing season, sarang na nga makapangisda ang mga manugpangisda sa bilog nga rehiyon.
Nahibaluan nga tinutuyo sang nasambit nga fishing ban nga mahatagan sang tion ang mga isda sa kadagatan nga makapadamo agud mas mag-umwad ang produksyon sang isda sa rehiyon kag suportahan ang food security.
Hugot man nga nagpahanumdom si Director Appari sa mga local nga manugpangisda nga likawan gid ang illegal fishing agud indi makahalit sa kadagatan.
.){kind=link}