Gin-imbestigaran sang Commission on Elections (COMELEC) ang tatlo ka mga nadakpan sa Sta. Cruz, Laguna nga nagapakuno-kuno nga trabahador sang poll body.
Ang mga nadakpan ang naggamit sang peke nga mga dokumento kag bisan ang ila nga mga salakyan ang may logo sang COMELEC.
Kaangot diri, ang tatlo ang natukiban nga magpamilya.
Suno kay Commission on Elections (COMELEC) Chairman George Erwin Garcia, gina-ako sang mga suspek nga empleyado sila sang task force Kontra-Bigay kag naga-inspeksyon sang isa ka eskwelahan sa Laguna kun sa diin may mga Automated Counting Machines (ACMs).
Apang, ginklaro ni COMELEC Chairman Garcia, nga indi na task force ang Kontra-Bigay para sa palaabuton nga election, kundi isa na ka kumite, nga gilayun man ginkumpirmar nga indi empleyado sang COMELEC ang mga suspek.
Dugang pa ni COMELEC Chairman Garcia, nga isa ini ka dako nga problema nga posible magamit sa pagpanunto sang mga botante kag mga kandidato.
Ginaklaro man ni Garcia sa publiko, nga kun magpadala man sang mga tinawo ang COMELEC Main Office, maga-coordinate anay ini sa local COMELEC.
Sa kaso sang tatlo ka suspetsado, wala sang ihibalo ang ila Lokal nga opisyales.
Ginpasalig man ni Garcia nga magapangatubang sang kaso nga ‘usurpation of authority kag falsification of public documents’ ang tatlo ka suspek.
