ILOILO CITY – Dakup sa ginpatigayon nga entrapment operation ang tatlo ka lalaki sa Barangay Tagbak, Jaro, Iloilo City bangud sang pagbaligya sang loose firearm, Setyembre 12.
Ang subject sang operasyon amo si Roberto Billones, 46 anyos, residente sang Barangay Mabini, Dumangas, Iloilo nga amo ang nagbaligya sang .45 caliber pistol.
Lakip man sa nadakpan amo sanday Jimboy Togonon, 32 anyos sang Brgy. Paloc Bigke, Dumangas, Iloilo kag si John Rae Molina, 40, anyos sang Parc Regency, Pavia, Iloilo.
Sa interview sang Bombo Radyo kay Police Major Gervenson Muyo, chief intel sang Iloilo Police Provincial Office, iya ginpahayag nga sa Dumangas kuntani patigayunon ang entrapment operation apang sang ulihi, nag-inform ang suspek nga sa syudad sang Iloilo.
Sa impormasyon sang pulis madugay na nga kawatan kag may background man sa pagbaligya sang iligal nga droga si Billones.
Ini ang ivalidate pa sang pulis kag kuhaon man ang dugang nga background information sa duha ka mga kaupod sini.
VERSION NI ROBERTO BILLONES
Nagdepensa naman si Billones nga indi iya ang armas nga nakuha sa iya.
Suno kay Billones, si Togonon kag si Molina ang nagapanag-iya sang 9mm kag .45 caliber pistol.
Ginpahayag ni Billones nga kahapon pa lang, human na ang ila transaksyon nga ibaligya ang amo nga mga armas sa balor nga P62,000.
Si Togonon suno kay Billones ang may contact sa ila nga buyer apang “ginlaglag” siya sang iya ka-transaksyon kag wala man siya nakahibalo nga wala naman sang lisensya ang armas nga ila dala.
VERSION NI JIMBOY TOGONON
Suno naman kay Togonon, ginhagad lang siya ni Billones nga magkadto sa Tagbak, Jaro subong nga adlaw kag wala gid siya sang ideya nga amo sini ang matabo.
Ginpahayag ni Togonon nga isa pa lang niya ka semana nga abyan si Billones kag nakahibalo siya nga may background ini sa pagpangawat apang wala siya sang hinalung-ong nga dalahigon siya sa pagbaligya sang wala marehistro nga armas.
Hugot ang panindugan ni Togonon nga isa siya anay ka security guard kag apisar wala na siya subong sang trabaho, wala siya siya nagapasakop sa kaangay nga iligal nga aktibidad.
VERSION NI JON RAE MOLINA
Nagapanindugan naman ang isa ka suspek nga si John Rae Molina nga wala siya nakakilala kay Billones.
Nahibaluan nga iya salakyan ang ginsakyan sang sila ang nagpadulong sa Tagbak subong nga adlaw, apang suno sa iya, ang iya bayaw lang nga si Togonon ang abyan ni Billones.
Ginpahayag ni Molina nga may kuhaon kuntani siya nga ilihawon nga manok sa syudad kag nag-ulayhon lang siya kay Billones.
Suno kay Molina, isa siya ka home-based graphics artist kag wala sang involvement sa amo sini nga aktibidad.
Kaso nga paglapas sa RA 10591 ukon Comprehensive Firearms and Ammunition Regulation Act ang pangatubangon sang mga suspek nga yara subong sa Jaro Police Station. #
*****
Hibaluon pa sang Bombo Radyo kun ano ka matuod nga 9mm kag .45 caliber pistol ang ginbaligya sang tatlo ka lalaki (santo sa panaysayon ni Billones) apang .45 caliber pistol lang ang nakabutang sa report sang kapulisan. Bantayi ang dugang nga detalye)
