ILOILO– Dakop ang tatlo ka lalaki sa ginpatigayon nga drug buy bust operation sa Brgy. Our Lady of Lourdes, Jaro, Iloilo City.
Ang mga arestado ginkilala sanday Ralph Galve,32 anyos, Dindin Galve, 27, kag Dave Angelo, 26 anyos lunsay residente sang nasambit nga lugar.
Nakuha sa ila posisyon ang 14 ka sachets sang ginapasuni ilegal nga droga kag P1,100 nga buy bust money.
Sa interview sang Bombo Radyo kay Ralph Galve, isa sa mga arestado, iya ginpahayag nga nakibot lang sila sang gulpi lang nagsulod ang kapulisan sa ila nga opisina.
Suno sa natungdan wala sang transaksyon nga natabo pag-abot sang mga pulis kag gulpi lang sila ginpusasan.
Gin-ako naman sang isa sa mga na aresto nga si Dindin Galve nga halin sa iya ang mga drug praphernalia nga nakuha apang nagpamalibad na ini nga maghatag sang dugang pa nga mga detalye bangud ginapahayag nag lain ang pamatyag sini.
Samtang suno kay Police Staff Sergeant Alvin Casamayo head sang City Drug Enforcement Unit, tatlo na ka semana nila nga gina monitor si Dindin Galve nga subject sang ginpatigayon nga drug buy bust.
Dugang sang natungdan, sa Bacolod City pa nagahalin ang mga items nga gina baligya sang mga durugista.
