Tatlo ka linemen ang magaatubang sang sampaw-sampaw nga kaso matapos nga madakpan sang MORE Power nga nagabaligya sa isa ka junk shop sang ila ginkawat nga kable sang kuryente.
Ang mga arestado amo sanday Leo Dela Cruz, Mark Xyrone Cabansay, kag Joseph Mobe, lunsay mga empleyado sang FVE Electrical Services and Supply Corporation nga kontratista sang MORE Power.
Suno sa mga suspek, ila ginkarga ang tatlo ka rolyo sang mga kable sang kuryente halin sa ila nga barracks sa Buntatala, Jaro, sa ila nga service truck sang Sabado sang aga (Enero 25) kag gindala sa junk shop sa Brgy. Cagamutan Norte, Leganes, para ibaligya.
Mismo ang mga gwardya sang MORE Power ang nagdakop sa mga suspek kag ginturn-over sa Leganes PNP antes gindala sa Jaro Police Station.
Ginabanta nga indi magnubo sa P50,000 ang balor sang ila ginkawat nga kable.
Nagpasaka sang panumubong nga qualified theft ang MORE Power batok sa mga suspek nga gin-detain na subong.
Dugang nga panumbungon nga paglapas sa Anti-fencing law kag posible nga paglapas sa Anti-Pilferage law ang ipasaka man batok sa mga suspek.
