Gina-forecast sang state weather bureau nga tubtub sa tatlo ka mga bagyo ang magasulod ukon magaporma sa sulod sang Philippine Area of Responsibility (PAR) subong nga Agusto.
Sa latest nga update sang Philippine Atmospheric, Geophysical and Astronomical Services Administration (PAGASA), mataas ang tyansa nga mangin Tropical Depression sa masunod nga 24 oras ang isa ka LPA nga na-monitor sa guwa sang PAR nga ulihi nakit-an sa 1,010 kilometros naaminhan-nasidlangan sang Extreme Northern Luzon.
Apisar ginalantaw nga indi ini direkta makaapekto sa Pilipinas, mahimo gihapon ini magsulod sa PAR, kag mahimo pangalanan nga “Fabian.”
May na-obserbahan man nga cloud clusters sa nasidlangan sang Mindanao nga possible mangin bagyo. Kun mahimo nga bagyo, tawgon sila nga sanday “Gorio” kag “Huaning.”
Base sa state meteorologists, may apat ka posible nga agyan sang bagyo subong nga bulan.
Duha ka senaryo ang posible nga pa-naaminhan nga hulag halin sa northern Visayas ukon Central Luzon pakadto sa Northern Luzon nga mahimo magresulta sa landfall. Sa iban nga kaso, mahimo ini magkadto sa direksyon sang Taiwan, Southern China, ukon sa Ryukyu Islands nga wala sang direkta nga impact sa Pilipinas.#
