ILOILO CITY – Nagapabilin sa gihapon sa ospital ang tatlo ka mga estudyante sang Pili National High School nga nagpositibo sa amoeba bangud sang gin-inom nga buko juice.
Sa interview sang Bombo Radyo kay Ma. Luz Delos Reyes, superintendent sang Department of Education-Schools Division of Iloilo, iya ginpahayag nga 45 tanan ang gindala sa ospital lakip na ang napatay nga estudyante kag ang 41 diri ang na-discharge na.
Magluwas sina, may isa pa ka estudyante nga nagbatyag man apang wala na gindala pa sa ospital.
Sa resulta sang imbestigasyon, isa lang ka section ang involve sa amo nga infection kag classroom gathering lang ang ginpatigayon.
Ang mga pagkaon ang ginluto sang ila mga ginikanan kag ginpasulod sa eskwelahan sang lunch time.
Nahibaluan nga base sa imbestigasyon sang health authorities sang banwa, ang ice water nga gingamit sa paghimo sang juice ang nakitaan sang E.Coli kag Coliform bacteria ang ice nga gingamit sa pagtimpla sang buko pandan juice nga gin-inom sang mga estudyante.
Kun balik-balikan, aga sang Nobyembre 4 sang ginpatigayon ang United Nations Celebration.
Pagkatapos sadto, nagkaon ang mga estudyante upod ang ila manunudlo.
Naka-eksperyensya sila sang vomiting kag diarrhea.
Sang Domingo, Nobyembre 6, nagpadayon ang ginbatyag nga sintomas sang mga estudyante kag naglala ang ila nga sitwasyon.
Gilayon sila nga ginpangdala sa nagkalain-lain nga ospital sa norte kag isa ang napatay.
