ILOILO CITY – Gin-disqualify sang Miss Philippines Earth organization ang tatlo sini ka mga kandidata bangud sang height requirement, isa ka adlaw antes ang announcement sang top 20 finalists.
Apisar nga yara na sa tunga-tunga ang kompetisyon kag may yara na sang preliminary activities, gin-disqualify ang designer nga si Angela Okol sang Surigao, amo man ang singer-model nga si Cess Cruz sang Antipolo kag model nga si Renee Coleen Sta. Teresa sang Batangas.
Ginpanindugan sang MPE organizer nga si Lorraine Schuck nga sundon sang organisasyon ang ila nga desisyon.
Suno sa iya, ang Miss Philippines Earth pageant ang may yara sang kaugalingon nga criteria.
Ang mga kandidata ang dapat nga magsunod sa mga requirements lakip na ang standard nga 5-foot-4 minimum height requirement.
Nasubuan man ini kag nanugon bangud nga lunsay mga matahom kag maalam ang tatlo apang dapat nga mangin fair man sa iban nga kandidata nga na-comply ang mga requirements.
Ang actual height measurement ang ginpatigayon kahapon, isa ka adlaw antes ang announcement sang final 20 karon sa gab-i.
Ang coronation sang Miss Philippines Earth ang patigayuno sa Agosto 6 sa Coron, Palawan.
Ini ang una nga tion nga may yara sang live audience matapos ang duha ka tuig nga virtual competitions.
Ginpasalamatan man ni Lorraine ang tatlo ka mga kandidata.
Ang ila mga videos ang magapabilin sa site kag online platform sang organization kag mahimo pa nga makabaton sang special awards.
Ini ang ginkasubo man ni Renee Coleen kag amo man ni Angela.
Apisar sang panawagan sang publiko kag pagdula na sang pila ka local beauty pageants, nagpanindugan si Lorraine nga magapabilin sa gihapon ang height requirement sa Miss Philippines Earth.
