Arestado ang mag-utod kag isa ka indibidwal sa ginkasa nga drug buy-bust operation sang Iloilo City Police Station 4 sa Zone 6, Barangay, Boulevard, Molo, Iloilo City.
Ang mga mag-utod amo sanday Marlon Lauron, 35, Mark Anthony Lauron, 34, kag lunsay residente sang nasambit nga lugar.
Samtang, dakop man ang ila upod nga si Jovet Balsomo, 18, tricycle driver, kag residente sang Barangay Monica, City Proper, Iloilo City.
Sa interview sang Bombo Radyo kay Police Lieutenant Lloyd Pagulayan, Deputy Station Commander sang Iloilo City Police Station 4, iya ginpahayag nga posible nagakuha ang mga ini sang iligal nga druga sa Barangay Bakhaw, Mandurriao, Iloilo City.
Suno kay Pagulayan, ginareklamo sang mga pamuluyo sa nasambit nga Barangay ang duwa ka mag-utod bangud sa pagbaligya sang druga.
Dugang pa sang natungdan, natigayon nga nabaklan si Marlon sang isa ka plastic sachet nga suspected shabu gamit ang P1,500 nga buy-bust money.
Na-recover man ang ginabulubanta 5 grams sang suspected shabu nga may P34,000 nga market value.
Sa subong yara na sa kustodiya sang mga otoridad ang mga subjects kag magapangatubang sang kaso nga paglapas sa Republic Act. 9165 ukon Comprehensive Dangerous Drugs Act of 2002.
