ILOILO CITY – Arestado ang tatlo ka mga mag-abyan matapos ginserbehan sang warrant of arrest bangud sa paghimulos sang isa ka menor de edad sa Badiangan, Iloilo.
Ang isa sa mga suspek amo si Marlon Carnaje, 18, nadakpan sa Mandurriao, Iloilo City.
Siya ang no.8 most wanted person sa Region VI, no.2 sa probinsya sang Iloilo, kag no. 4 sa Badiangan, Iloilo.
Two counts of rape ang ginpasaka batuk sa iya kag wala sang pyansa nga ginrekomendar.
Samtang, arestado man ang tiyo sini nga si John Kevin Carnaje, 19, construction worker kag na-aresto sa Barangay Mainguit, Badiangan, Iloilo.
Siya ang no. 9 most wanted person sa Region VI, no.3 sa probinsya sang Iloilo, kag no. 6 sa Badiangan, Iloilo.
Arestado man ang abyan nila nga si Romulo Agjon, construction worker, residente sang Barangay Sianon, Badiangan, Iloilo kag na-aresto sa Barangay Iniligan sa amo nga banwa.
Siya ang no.3 most wanted person sa probinsya sang Iloilo kag no. 5 sa Badiangan.
Sa interview sang Bombo Radyo kay PSSgt. Anbalyn Rica Panilla, imbestigador sa Women and Children Protection Desk sang Badiangan Municipal Police Station, iya ginpahayag nga ang kaso ang nag-ugat sa duha ka rape incidents nga nakomiter sang mga suspek sang Hunyo 10 kag Agosto 2 sang nagligad nga tuig.
Natabo ang pagpanghimulos sang 16-anyos pa lamang ang biktima nga textmate sang isa sa mga suspek nga amo si Alyas Marlon.
Sa subong, preso na ang tatlo sa Badiangan Municipal Police Station.
