SARA, ILOILO – Gin-relieve na sa pwesto ang tatlo ka mga pulis nga ginapahayag nagluthang patay sa 26 anyos nga lalaki sa ginpatigayon nga checkpoint sa Barangay Zerrudo, Sara, Iloilo.
Ang biktima amo si Adonis Hontiveros, 26 anyos.
Sa interview sang Bombo Radyo kay Iloilo Police Provincial Office Police Col. Roland Vilela, iya ginpahayag nga ang mga ginpang-relieve nga mga pulis amo sanday Police Corporal Alfredo Bartolo Jr., Patrolman Christopher Paclibar kag Police Corporal John Michael Parcia.
Ang mga nasambit nga pulis ang nagikan sa Second Platoon Mobile Force Company.
Suno kay Vilela, yara sa subong ang tatlo ka mga pulis sa kustodiya sang Sara Municipal Police Station.
Dugang pa sang natungdan, wala intensyon ang mga pulis nga patyon ang biktima sa diin ila pa gani ini nga gindala sa ospital.
Nahibaluan nga ang pagpatigayon sang checkpoint ang isa man sa tikang sang mga kapulisan sa pagtapna sang terorismo kag insurhensya bangud sa asud-asud nga pag-atake sang New People’s Army sa mga kabanwahanan.
