GUIMARAS – Blangko sa gihapon ang pamilya may kaangtanan sa pagluthang-patay sa 53 anyos nga lalaki sa Brgy. Supang, Buenavista, Guimaras.
Sa interview sang Bombo Radyo kay Punong Barangay Hernan Velasco Sr., iya ginpahayag nga ang biktima ang ginkilala nga si Miguel Iniano III samtang ang tatlo ka mga suspek ang wala pa makilala tubtub sa subong.
Sang natabo ang krimen suno kay Velasco, kaupod sang biktima sa balay ang anak nga dalagita nga amo pa ang nagbukas sang pwertahan sang nagpanuktok ang tatlo ka persona kun sa diin ang duha ang naka-bonnet samtang naka-helmet naman ang isa.
Ginpahayag ni Velasco nga lunsay nakasakay sa motorsiklo ang tatlo nga nagpakilala pa nga mga personnel sang Guimaras Electric Cooperative Inc.
Si Iniano suno sa Punong Barangay ang yara sa sulod sang kwarto kag ginpilit sang tatlo nga paguwaon apang nagpamalibad ang biktima.
Bangud sini, naglibot sa guwa sang balay ang mga suspek, ginbuka ang crystal nga bintana kag ginluthang si Iniano.
Madamo nga lupok ang nabati-an sang mga residente sa lugar kun sa diin dead on the spot ang biktima nga suno sa Barangay Official, wala man sang malain nga record sa ila lugar.
